Azzjonijiet skont l-Att dwar is-Servizzi Diġitali għall-protezzjoni tal-minorenni

Il-Kummissjoni Ewropea ħadet żewġ azzjonijiet ta’ infurzar skont l-Att dwar is-Servizzi Diġitali.

Il-Kummissjoni nediet proċedimenti formali biex tinvestiga jekk Snapchat tiżgurax livell għoli ta’ sikurezza, privatezza u sigurtà għat-tfal online, f’konformità mal-Att dwar is-Servizzi Diġitali. Snapchat seta’ kiser l-att billi espona lill-minorenni għal tentattivi ta’ grooming u reklutaġġ għal skopijiet kriminali, kif ukoll għal informazzjoni dwar il-bejgħ ta’ drogi u alkoħol.

Barra minn hekk, il-Kummissjoni sabet b’mod preliminari li Pornhub, Stripchat, XNXX u XVideos jiksru l-Att dwar is-Servizzi Diġitali billi ma jipproteġux lill-minorenni mill-esponiment għal kontenut pornografiku fuq is-servizzi tagħhom. Għalkemm it-termini tas-servizz jiddikjaraw li s-servizzi huma maħsuba għall-adulti biss, l-erba’ pjattaformi kollha jippermettu lill-minorenni jaċċessaw permezz ta’ klikk sempliċi, li jikkonferma li għandhom aktar minn 18-il sena.